Marantau

 MARANTAU. 

Sapanjang curito rang saisuak

Pantang bujang manunggu kampuang

Hino kok rantau tak tajalang

Mandeh mausia jo pituah

Karatau madang diulu 

Babuah babungo balun 

Marantau bujang daulu 

Di rumah paguno balun

Wujuik marantau bukan mancari ameh jo perak 

Indak manuntuik kakayoan 

Di kampuang apo nan kurang

Tapi malambuak paham jo pikiran 

Manambah isi dalam dado

Isuak kok alah jadi urang 

Dado lah sarek jo ulemu

Budilah panuah dek takaran 

Bijak arih akalah cadiak

Sanang baganjua pulanglah lai

Bangunlah adaik jo limbago

Paliharo koto jo nagari 

Irik rantangkan kamanakan

Kini masolah barubah juo

Anak kamakanakan bakambangan 

Ladang taruko indak batukuak 

Di sawah tajak indak cukuik 

Di lapiak pinggan indak sadang

Mangko diragang padang pangimpauan 

Ka rantau kampuang dipalaweh

Tapi dek runciang talampau rauik

Dek tarah talampau dalam

Lah langang pulo ranah Minang

Urang dagang nan indak pulang lai

Marantau cino rang namokan

Jikok disilau lah ka nagari

Labuah samak tapian tingga 

banda baliku nan lah pupuih 

Maratok rumah gonjong limo

Janjang patah pintu basaok

Diimbau mandeh tak babunyi

Pusako sialah ka manolong

Warih sialah ka manjawek

Nasib di rantau lah mamak danga

Sugalo kakoklah baawai

babagai carolah di tampuah

Antahlah tagah jo larangan 

Itu nan alun takaokan

Nyato nan takah kini nan ko

Makin dikayuah makin larek

Kian calak kian kabua

Kampuang batambah hitam juo

Kok iyomalah kian 

Sabalun hari barembang patang

Molah baganjua suruik 

Elok juo kampuang dihuni

Kok indak manambah jo manukuak

Tapaga juo pusako lamo

Talambuak sawah jo ladang 

Tasisik tinaman tuo 

Hiduik sumarak Minangkabau

Patuik taruko dipalaweh

Parak jo gurun dipaleba

Disadang tajak ka Sitiuang 

Dilantak pancang ka Pasaman

Bangkalai kito manyudahkan

Adopun salaruik salamo nan ko

Dek lengah lalai awak juo

Gilo dirintang alang mudo 

Padi rabah baparayamkan 

Jarami dikisai urang tak guno digaro lai

Kini bapasan Marapi jo Singgalang

Baimbau Singkarak jo Maninjau 

Urang rantau pulanglah baa 

Silaulah kampuang jo hilaman 

Banyak bangkalai nan tak sudah

Minangkabau mananti juo

Ket : Dikutip dari file MP3 Balerong Group - Gurindam Kato Parasaian, Yus Dt Prapatiah.