Kato sampai

 Serial.  : PASAN MAMAK ...!!!

- KATO SAMPAI -

Lah panjang gurindam batulih, nan tatuju untuak kamanakan, jikok disimak jo titih, sarek carito pangalaman.

Pangalaman adolah guru, baitu rang bijak mangatokan, dek sabab karano itu, mamak cubo manyampaikan.

Malabihi kok maancak ancak, mangurangi tantu kasio sio, mudah mudahan kamanakan bijak, manyikapi tutua mamak nangko.

Lah panjang carito mamak sabuik, baa parangai anak gadih, nan ka jadi tuntunan hiduik, jan isuak babuah tangih.

Masih ado nan ta icia, nan patuik pulo dikampuangkan, baa pulo caro bapikia, adat awak lah ma ajakan.

Jalan salangkah madok suruik, kato sapatah dipikiakan, jan asa sumbarang sabuik, ingek i ka manyeso badan.

Bakato paliharo lidah, bajalan paliharo kaki, dek ulah kato sapatah, banyak dandam di bao mati.

Pikiakan nan ka disabuik, jan sabuikkan nan tapikia, sampaikan jo lamah lambuik, urang mandanga indak tagisia.

Bakato dulu baru mangecek, itulah kunci pergaulan, tau di kato nan ampek, gurindam adat lah manjalehkan.

Partamo kato mandaki, baa mangecek jo urang tuo, tamasuak mangecek jo laki, indak mangicuah jo baduto.

Indak panyolang jo pambantah, urang tuo paibo hati, lunakkan gigi pado lidah, itu tando anak babudi.

Buliah sajo malawan guru, asa lai jo dalianyo, tapi bukan ma adu tinju, atau somboang manapuak dado.

Malawan mamak jo pituah, tapi di ateh kabanaran, bukan ilah bantah mambantah, durako kamanakan rang imbaukan.

Kaduo kato mandata, mangecek jo kawan samo gadang, sambia bagarah di palanta, kato bana kasampai surang.

Bara bana bakaruak arang, walau ka sampai basirah muko, hati gadang barabu kambang, nan dandam jarang tasuo.

Katigo kato malereang, mangecek jo ipa dengan besan, panuah ereang jo gendeang, sarek bahaso jo kiasan.

Indak mangecek tembak tupai, tapi carito ba sisampiang, niat lalu mukasuik sampai, hati mandanga indak sumbiang.

Ka ampek kato manurun, kato nan panuah kasiah sayang, disampaikan jo caro santun, indak mahariak mambulalang.

Kok manyuruah ma lunak lunak, mintak toloang jo lamah lambuik, jarang suruah ka nyo tulak, jauah dakek pastinyo turuik.

Lah ampek ragam batutua kato, nan patuik ditiru di amalkan, mamak tambahkan  duo kato, anam jadinyo dipakaikan.

Kato partamo batapati, kato kudian kato bacari, jikok disilau makna jo arti, mulia i  ikara tapek i janji.

Kok nyampang ado halangan, janji ndak mungkin tapanuahi, sampaikan baliak taruih tarang, janji baru buek kumbali.

Bukannyo taniang basianok, bantusk urang indak basalah, urang manunggu lah sasak angok, awak santai basilengah.

Panduto itu namonyo, isuak urang ndak picayo lai, itu yang harus dijago, jan sampai kadapek an budi.

Nak luruih rantangkan tali. Nak mulia  tapek i janji, nak gadang tinggikan budi, nak haluih baso jo basi.

Oooi gadih kamanakan kanduang, panjawek warih pusako lamo, tutua mamak sadang tangguang, katukuaknyo saketek sajo.

Kato nan ampek lah batarimo, lah anam mamak cukuikkan, kaba carito  ampek  pulo, nan indak patuik disampaikan.

Partamu carito kaba buruang, antah buruang apo namonyo, carito nan indak tantu ujuang, dicari pangka indak basuo.

Pado bana, banyak dutonyo, isinyo antah lah antah, sajangka jadi sa eto, banyak carito tukuak jo tambah.

Usah itu disampaikan, hoax kato rang kini, mambuek nagari indak aman, itu banyak tajadi kini.

Kaduo curito kaba angin, carito di bao urang lalu, nan dicaritokan lah tabang cigin, salah jo bana indak nan tau.

Antah tapuang antah sadah, antah lamang nan badarai, nasi ditanak babuangkan, antah asuang antah pitanah, antah urang manyuruah carai, tapi di awak lah ba iyokan.

Ka tigo  kaba curito sabananyo, kaba sahiah urang sabuikkan, tapi isinyo mungkin rahasio, nan indak patuik dikabakan.

Agak-i urang ka dapek malu, tenggang kampuang nan kaburuak, kok dapek kaba sarupo itu, disimpan arek sampai lapuak.

Banyak kaba pakaro kaba, tamasuak kaba carito lamo, ado nan patuik jadi ota, ado tatap jadi rahasio.

Ka ampek  *kaba *nan banyak, *Kaba*  barito dalam Koran, *Kaba* tinju jo *kaba* cakak, sampai jo *kaba… kaba* bunuhan.

"Kaba" tarakhir "kaba" sampaikan, "Kaba" baliak "kaba "nagari, tapi baalah ka ma "ngaba" kan, mamak sadang "kaba" laran kini.

By.Saliguri - Yan Majobasa.