Rantau

 Gurindam Sanjo.....

RANTAU BAKIRIM SI AYIA MATO

dikaka padi dalam lumbuang

masak jo boneh mamak yanto

Dagang jauah  dari kampuang

raso badarai si ayia mato

Mandeh Maarok kaba barito

rintang dek bujang  ilang bayang

taserai tangih  di barando

talepai kaki di anak janjang

Mandanga kaba dari kampuang

Jatuah ka dalam siayia mato

Mandeh batutua dalam garuang

Maratok dagang mandanganyo

Surek sapucuak mandeh tuntuik

Nasib nak mintak dibaritokan

Untuang dagang kok disabuik

Kok putuih angok mandangakan

bukan berang tak basabab

Usah mandeh manyasa diri

Tanyo urang kok mandeh jawab

Katokan sajo daganglah mati

Mandeh mandanga kaba buruang

Dagang dirantau salah jalan

Indak disasa dagang binguang

Labuah banyak nan saroman

Sulik dicari ka pidoman

Samo sajo siang jo malam

Mano kawan sarato lawan

Banyak musang babulu ayam

Dirantau dagang bak mamukek

Rintang dek bayang ikan gadang

Badan dingin mukolah pucek

Tiok di jalo lubuak baransang

Indak baniat marantau abih

Rantau cino mandeh sabuikkan

Kok indak lakunyo ikan bilih

Indak ka larek dari tapian

Batu tataruang lai macinto

Kununlah kampuang jo halaman

Kok indak  buruak nasib jalo

Lah dagang japuik mandeh jo sampan

Siriah layua gambia lah masiak

Batuduah dagang mabuak kiambang

Santano di lauik mandeh caliak

Daganglah rintang jo galombang

Ombak gadang badai manggilo

Iko kurenah gadang sampan

Untuang sudah janjian  tibo

Bakubua badan indak banisan

Lauik sati rantau batuah

Ilmu di badan tangguang pulo

Layia cabiak dayuang kok patah

Tampan ka larek salamonyo

Manangih lasuang di pintu kandang

Kinantan tabang indak babaliak

Manga dek itu mandeh bimbang

Labiahkan sayang ka nan kuriak

Sayang mandeh disabuik bana

Tiok di ingek ba ibo hati

Di kampuang jaguang mandeh kaka

Di rantau kasiak kami cotok-i

Mangaih rimah tabuang

Mangakeh sapanjang jalan

Sanjo tibo malam kok datang

Ka sayok kapalo basuruakkan

Cupak dituka rang padagang

Laku urang nan mandeh baco

Kok tau mandeh jo Tanah abang

Nyo tuka karambia jo kapalo

Di kampuang pipik mandeh jago

Ayam makan bapabiakan

Dirantau kami dapek garo

Tiok hinggok kanai pinggalan

Dangalah ratok kaki limo

Bak cando murai kasiangan

Dicubo pindah ka toko

Gadang singguluang pado baban

Danga pulo rauang rang oto

Bak cando rumah tapanggang

Takumpua pitih sabenggo

Saparo pambayia tilang

Latiah tangan nan bagayuik

Pitih sarimih nan tabao

kakain senteang kabaju sayuik

pagi dapek lindehnyo sanjo

Manggaleh sahabih garuang

Barang nan indak urang tanyo

Nyo kisai kain baguluang

Nyo tanyokan nan ndak ado

Kini ndak tantu ka dibaco

Sajak badan mandapek kaba

Mandeh di kampuang lah ba iyo

mangko di rantau lah ilang aka

Dulu kan alah denai sabuik

Siriah urang mandeh tarimo

Langkah denai sadang tapauik

Tagah dek mandeh kareh juo

Kini co iko nan tajadi

Minyak abih samba ndak lamak

Bagantuang urang ndak batali

Taserak malu ka urang banyak

Kini ka mandeh denai bapasan

Usah di upek dagang nangko

Rilakan sajo nan tamakan

Ampun kan dagang salamoko....

#Tapian Rantau.30 okt 2018