Nasehat Mamak

 NASEHAT MAMAK 

BILO JADI SUMANDO URANG ..

       Asslamualaikum Wr,wb...

Manuruik urang candikio

Nan bapadang laweh jo aka

Balubuak dalam jo budi 

Adopun sumando tabagi ampek macam ..

Nan ciek nan kadipakai 

Nan tigo buang jauah jauah ..

Manolah macam nan ampek 

NAN PARTAMO,,SUMANDO KACANG MIANG .

NAN DIKATOKAN SUMANDO KACANG MIANG .

Manyeso dirumah gadang 

Manggata kayu pabisan 

Banang tarantang di putuih nyo 

Nan kusuik di enjo-enjo juo 

Aia taganang di rancah nyo 

Nan karuah di kundak kundak ..

Awak sakandang indak sabaun 

Jo mintuo indak barelok 

Jo pambayan ba musuah batin 

Mamak rumah di upek juo .pantang kan bana 

Nan baitu ,cilako sumando tu namo nyo ..

NAN KADUO ,SUMANDO LANGAU IJAU 

BAA SUMANDO LANGAU IJAU ..

Tabang ilia inggok di mudiak 

Disiko batabangan disinan talua manateh 

Satu nampak saik nan baru awak maraok 

Kasubalah.itu sumando rembang mato 

Gilo kawin gilo ba bini ,bajando satiok liku 

Anak baserak bilang kampuang 

Jauah kan parangai langau ijau yuaang ..

Tacacek sipaik nan bak itu .

NAN KATIGO ,,SUMANDO LAPIAK BURUAK 

CALIAK LAH NASIB LAPIAK BURUAK 

Takirai pasa biaso talangkah indak mambaa

Masak lanyau kiliran kaki 

Namun inyo di lantai juo 

Arati nyo gilo maulik anak bini 

Bak ayam tajaik jangkie 

Manjadi kutu rumah gadang 

Dunsanak indak tasilau 

Kamanakan haram tabimbiang 

Urang kampuang di bao lengah 

Pendek nyooo...

Baparam sajo dalam biliak 

Hiduik manompang ka pusako 

Paisok mintak kabini 

Anak batambah banyak juo,

Usah di tiru nan bak kian yuang runtuah bana martabat awak ..

NAN KA AMPEK 

                SUMANDO NINIAK MAMAK 

ADO PUN SUMANDO NINIAK MAMAK 

Kalawan urang baiyo kusuik sato manyalasai 

Tibo di karuah mampajaniah 

Kato sapatah bama'anah 

Bak lampu di tangah rumah 

Mancahayo lape kahilaman 

Bendang nyo sampai kasubarang 

Tarang lah korong dengan kampuang .

MAKO PANDAI"LAH JADI SUMANDO ..

(Rudi Caniago) ..........